Rinugyanen ti gobierno a mangipasdek ti bukod nga strategic petroleum stockpile ditoy Pilipinas kalpasan a maapektaran iti supply ken presio ti langis gapu iti tension idiay Middle East.
Segun kenni Energy Secretary Sharon Garin, mangipakita daytoy ti pagkasapulan para iti natibker nga energy security ti pagilian, a mangnamnama la unay iti imported a langis.
Babaen ti plano, maipatakder dagiti pasilidad ti Philippine National Oil Company (PNOC) tapno agurnong ti reserba a langis a lumabes iti agdama nga imbentaryo dagiti pribado a kompania.
Panggep daytoy a makaipaay ti kanayunan a buffer iti supply ti pagilian iti oras ti krisis.
Mapatta-patta a dumanon ti 500,000 barrels iti umuna nga stockpile nga addaan ti nasurok-kumurang ₱5 billion, karaman iti panangipatakder dagiti tangke, pipeline, pantalan, ken dadduma pay pasilidad.
Makikokoordinar metten iti gobierno iti Philippine National Oil Company ken Maharlika Investment Corporation tapno malpas iti katulagan, kasaruno ti feasibility study ken site evaluation.
Plano met ti gobienro a padakkelen iti reserba tapno manayunan iti agdama a 30 agingga 60 nga aldaw nga imbentaryo dagiti probado a kumpanya, ken manayunan pay ti nasurok-kumurang 30 nga aldaw a buffer stock.###
