LA UNION – Agtaltalinaed a numero uno wenno top rice importer ti Pilipinas iti intero a lubong.
Maibasar iti report ti United States Department of Agriculture (USDA), aganay 4.7 million MT a bagas iti pakabuklan nga angkaten ti Pilipinas para ita a tawen, nangat-ngato ti 2.2% ngem iti pinatta-patta a 4.6 million MT, gaputi napigsa a demand iti Vietnam rice.
Idi maudi a paset ti Setyembre, iti inangkat a bagas ti Pilipinas ket umaboten ti pakabuklan a 3.28 million MT, nangat-ngato nu ikumpara iti pinatta-patta a 2.68 million MT.
Inton 2025, namnamaen a ngumato manen iti rice imports ti pagilian, agingga iti 4.9 million MT, gaputi bassit nga apit dagiti lokal a mannalon, gaputi epekto ti El Niño, La Niña, ken dagiti naglabas a napipigsa bagyo .
Iti baro a patta-patta ti USDA ket maiyannurot iti nangato a forecast para iti sangalubongan a rice imports ita a tawen, nga adda pakainaiganna iti nangato a demand ti bagas manipud Malaysia ken Nepal.
