Posible a saan nga ag-export iti Pilipinas ti asukar idiay Estados Unidos ita a tawen, gapu iti kinakurang ti lokal a produksion tapno mapennek iti panagkasapulan ti domestic market ken ti US quota.
Segun kenni Sugar Regulatory Administration (SRA) Administrator ken CEO Pablo Luis Azcona, posible a makaaramidda laeng ti desision kalpasan iti panagrugi ti baro a milling season inton Oktubre 1, gapu ta agpannuray ditoy iti aktual a suplay.
Kabayatanna, impakita ti kaudian nga estadistika ti SRA a bimmaba ti produksion ti raw sugar iti 1.718 million metric tons iti crop year 2025-2026, manipud iti 2.086 million iti napalabas a crop year.
Laksid daytoy, nangipaulog iti SRA ti Sugar Order No. 3 para iti export ti raw sugar kas panagtungpal iti 2026 US sugar quota allocation, isu a saan pay a pinal iti naan-anay a pannakaputed ti exports.
Ti kinakurang ti suplay ket mainaig met iti epekto dagiti naglabas a didigra ken dadduma pay a karit iti panagpataud ti sugarcane.###
