LA UNION – Siniguro ni Presidente Ferdinand “Bongbong” Marcos Jr. a kaatnuman ket saan a sumuko ken agpa-adipen iti siasinuman.
Iti waragawag ti Chief Executive ket kasaruno iti naudi nga agresibo nga aksiyon ti China Coast Guard kadagiti suldado a Pilipino a nangisayangkat ti rotation and resuplly mission iti BRP Sierra Madre idiay Ayungin Shoal ken West Philippine Sea.
Nupay kasta, impaganetget ni Presidente Marcos Jr. a saan nga agusar iti Pilipinas ti nadursok nga addang, saan a mammutbuteng wenno agaramid ti pakadadaelan wenno pakadangran iti siasinuman, iti mapas-pasamak a tensyon idiay West Philippine Sea (WPS).
Impaganetget pay ni Presidente Marcos a ti panangdepensa iti pagilian ket saan a babaen iti giyera.
Inlawlawag na nga agtalinaed ti kinatibker ti Pilipinas, isunga saan a rumbeng nga ibilang a panangipabus-oy iti panagbalin a kalmado ken nakapya a disposisyon ti gobyerno.
