Nadundunor dagiti Pilipino a mangngalap gapo iti kabaroan manen nga agresyon ti China idiay Escoda Shoal.
Segun kenni Philippine Coast Guard (PCG) spokesperson for the West Philippine Sea Commodore Jay Tarriela ket 20 a bangka dagiti Pilipino a mangngalap ti hinarang ken nakapadas ti water cannon manipud ti China Coast Guard (CCG) vessels 21559 ken 21562, agraman dagiti sumagmamano pay a Chinese maritime militia vessels.
Nakagun-od dagiti biktima a mangngalap ti nagduduma a pasa ken open wounds malaksid pay dagiti perdisyon ti dua a bangka gapo iti high-pressure water cannon. Saan pay a nakuntento ti CCG Rigid Hull Inflatable Boats (RHIBs) ket pinuted da dagiti anchor lines dagiti bangka ti Pilipino.
Nakareponde met ti PH Coast Guard uray pay nu ginandat daitoy a harangan ti CCG vessels 21559, 5204 ken 21562. Dagos da a nangiyuswat ti atensyong medikal kadagiti biktima a mangngalap kasaruno ti panangiwaras ti umdas a petrolyo, yelo, ken taraon.
Agtultuloy ita a banbantayan ti BRP Malapascua (MRRV-4403), BRP Cape Engaño (MRRV-4411), ken MV Pamalakaya dagiti mangngalap a Pilipino tapno maliklikanen ti kapada nga insidente iti masakbayan.
