Nagpanawagan ni Senador Erwin Tulfo a papartaken ti panangrepaso iti Oil Deregulation Law gapu iti agtultuloy a panagngato ti presyo ti langis nga ingubuay ti gubat idiay Middle East.
Segun kenni Tulfo, dehado dagiti Pilipino gapu iti limitado a bileg ti gobierno iti panangkontrol ti presyo ken makisarsarita laeng kadagiti oil companies iti laksid ti direktiba a makibiang daytoy.
Suportadona met ti Senate Bill No. 641 wenno ti institutionalizing Transparency in the Philippine Downstream Oil Industry ni Senador Sherwin Gatchalian nga addaan panggep nga amyendaran ti RA 8479 babaen ti panangidatag ti “unbundled prices” tapno agbalin a nalawag iti breakdown ti presyo ti langis ken maliklikan iti overpricing.
Impaganetget ni Tulfo a nabayagen a kidkiddawen ti transport sector iti panagbalbaliw wenno panangpaawan-bileg iti nasao a linteg.###
