LA UNION – Pinadayawan iti lokal a gobyerno ti Bauang, La Union ti Pinay flight attendant a nagpaanak iti maysa a misis iti uneg ti eroplano kabayatan nga adda dagitoy iti tangatang.
Maysa resolusyon iti impasa ken inaprubaran ti Bauang Municipal Council a mangbigbig iti inaramid a kinasayaat ti fligth attendant a ni Kathleen Nonan, maysa a nurse a residente ti Barangay Dili ti nasao nga ili ken agtratrabaho iti Quatar Airways.
Iti pannakiuman ti Bombo Radyo kenni Kathleen, kinunana a maysa met laeng a Pilipino ti misis a tinulonganda iti uneg ti eroplano.
Iti istorya ni Kathleen, naggapu manipud idiay Doha, Quatar ti eroplano ken agturong iti Pilipinas idi a maammuanda nga agipasngayen ti misis kabayatan nga addada iti tangatang.
Inadaulwan ni Kathleen iti nangpaanak ti misis a nangipasngay iti nasalun-at a maladaga.
Nag-divert ti eroplano a nagluganan dagitoy idiay Bangkok, Thailand tapno iturong idiay ospital dagiti agina.
Kabayatanna, mapagsasaritaan pay laeng iti social media ken iti nasao nga ili ti inaramid a panagtulong ti nasao a flight attendant.
