LA UNION – Agsan-sanuong ita ti pamilya ti maysa a Pinay nurse a natay iti COVID 19 idiay pagilian nga United Arab Emirates (U.A.E).
Nabigbig daytoy iti nagan a Leslie Ocampo Concepcion, 32, maysa a homecare nurse, ken tubo ti Nagrebcan, Luna, La Union.
Base iti salaysay iti Bombo Radyo La Union iti cabagyan ni Leslie a ni Rolidel Concepcion, kinuna na a naakaran ni Leslie iti sakit a COVID 19 kadagiti katrabaho na a naka-quarantine gaputi virus.
Kinuna na a nagpositibo iti COVID test ni Leslie idi May 1, ngem maipagarop a naka-recover daytoy.
Naklaat laengen iti pamilya na idi impakaammo ti kompanya a pagtrab-trabahuan ni Leslie a natayen daytoy gaputi COVID 19 idi May 12.
Inulila ti biktima iti asawa na a ni Julius Concepcion ken maysa nga anak dagitoy.
Iti agdama, segun kenni Rolidel, ipros-proseso ti embahada ti Pilipinas idiay U.A.E. dagiti kasapolan a dokumento tapno maiyawiden ditoy pagilian iti na-cremate a bangkay ti nasao a nars.
