LA UNION – Maragsakan iti awan pay abak na pinoy boxer a ni John Leo Dato a naikkan manen iti maikadwa a gundaway nga agbalin a paset iti big fight ni Manny Pacquiao inton Agosto idiay Nevada, U.S.A.
Ni John Dato ket iggem na iti record a 16-win ken 1 draw record, ket tarigagay na a mantiniren a nadalus ti record na, ken target na nga agbalin a world champion iti lightweight division.
Kabilang ni John Dato iti undercard fight iti pay-per-view bout Manny Pacquiao kontra kenni Errol Spence inton August 22 (Manila time) idiay T-Mobile Arena, Las Vegas, Nevada.
Iti 28-year-anyos a boksingero ket tubo idiay Bangar, La Union ngem dimmackel idiay Santa Maria, California, ken iti agdama, iman-manehar na iti boxing gym daytoy ken isuna a mismo iti agserserbi a personal fitness trainer.
Base iti record, ni Dato ket immunan a limmaban kas paset ti undercard fight iti laban met laeng ni Pacquiao kontra kenni Keith Thurman idi June 2019, ket tinumbana iti kinalaban na a ni Juan Antonio Lopez iti fifth round.
Saan a nagbalin a lapped iti pandemya ti COVID idiay Amerika tapno agtultuloy ti panagrimat ti career daytoy kas boksingero, agsipudta namindua a daras a nangabak idi napalabas a tawen, ket nagun-od na iti knockout victories kadagiti kinalaban na nga isuda Angel Guevarra idi August 2020 ken Jorge Alberto Romero idi November 2020 idiay Baja, Mexico.
Ita a gundaway, kadwa ni Dato a lumaban iti Pacquiao-Spence undercard iti maysa pay a pinoy boxer a ni Mark Magsayo (22-0, 15 knockouts).
Iti pannakiuman ti Bombo Radyo kenni Dato, kinuna na nga agtawen isuna ti 17 idi agrugi nga agboksing ngem nakatulong tapno naan-anay a dumur-as ti kabaelan na nga agboksing babaen iti panagbalin daytoy a trackster ken football player idiay Pioneer Valley High School idiay Amerika.
Segun kenkuna, padasen na a suruten iti tugot ken panagballigi iti idolo na a ni Manny Pacquiao.
Ingkaso a mangabak iti nakatuding a laban na inton Agosto, posible a maaddaan iti dacdackel pay a laban ni Dato agingga agleppas ita a tawen.
