LA UNION – Nupay saanda a maliklikan ti agbuteng ket saan unayen nga agdandanag dagiti kakailian a Pilipino idiay Guam iti baet ti pangta a missile attack ti Amianan a Korea.
Iti pannakiuman ti Bombo Radyo ken ni Alex Coloma, tubo ti probinsia ti Benguet ken evangelist idiay Mangilao, Guam, kinunana a gapu iti inspiring a mensahe ti kanilang gobernador ket saandan a mapukawan iti kired ti pakinakem para iti kinatalgedda.
Segun kenkuana, nakasagana ti evacuation plan ti lugar dagitoy inkaso a matuloy ti panagraut ti North Korea.
Napakdaaranda pay nga agtalinaed iti uneg ti balay bayat a naisuro met kadakuadan ti lokasion a mabalinda a pagturongan iti napeggad a sitwasion.
Iti baet daytoy ket immapela iti kararag ni Coloma kadagiti kakailian ditoy Pilipinas a mayadayoda iti ania man a peggad gapu iti pangta ti komunista a pagilian idiay Amerika.
