Pinaglibakan ni Bise Presidente Sara Duterte dagiti reports ti destabilisasion kontra iti administrasion, ken kenuna nga iti agdama a gobierno ket “insecure” iti boses ti umili.
Segun ti Bise Presidente, awan ti mapaspasamak a destabilisasion ken sayangguseng laeng dagitoy.
Kenunana a bukambibig ti administrasion iti sarita a destabilisasion gapo ta isuda a mismo iti agnernerbios.
Pinaglibakan na pay dagiti tsismis nga adda dagiti panagtataripnong tapno pabagsaken iti gobierno, ken no adda man bilang ket daytoy iti makabayan block nga addaan tarigagay nga agawen iti bileg ti administrasion.
Sinungbatan met daytoy ni Bayan Chairperson Teodoro Casiño ken kenuna a saan nga umno nga awagan a “destabilizer” dagiti agbirbirok ti accountability iti korapsion.
Impaganetget na nga iti panggep ti Makabayan ket baliwan iti korap a sistema ken saan a pabagsaken daytoy.
Nagtaud iti isyu ti destabilisasion iti nalawa a protesta kontra korapsion idi Setyembre 21 ken naaddaan ti tension iti nagbaetan dagiti rayilista ken pulis iti asideg ti Malacañang.###
