LA UNION – Iwarasen iti lokal a gobyerno dagiti survival seeds kadagiti naduma-duma a lugar iti probinsya a La Union babaen ti programa a “Plants VS COVID-19”.
Panggep ti “Plants Vs COVID-19” nga allukoyen dagiti agnanaed ti probinsya nga agmula iti natnateng iti bukodda nga arubayan tapno adda iti pakakumikuman dagitoy kabayatan nga agraraira ti enhance community quarantine.
Ti lokal a gobyerno iti La Union ket mangted ti libre a survival seed packs a naglaon kadagiti binhi ti parya, kamatis, kabatiti, tarong, kangkong, tabungaw, ken pechay.
Sigun kenni Provincial Information Officer Adamor Dagang, karaman kadagiti makaawat iti bin-i iti natnateng ket dagiti interesado nga agnanaed iti urban areas gapu ta mabalin met dagitoy nga agmula iti bakante a lote wenno kadagiti masitera.
Malaksid nga adda iti pakakumikoman babaen ti backyard gardening kinunana, a maysa met daytoy a pamay-an aniya tapno maaddaan ti kanayunan a suplay iti taraon ita nga adda ti krisis.
Adda metten ti naiwaras a contact number iti lokal a gobyerno para tapno makikoordinar dagiti agtartarigagay a makaawat ti survival seed packs.
Kabayatanna, inton bigat wenno aldaw ti Lunes ket nakasaganan a maiwaras ti first batch a 4,000 survival seed packs iti probinsya.
