BR LA UNION – Impaganetget ni House Assistant Majority Leader Pammy Zamora ti Taguig City nga adda legal nga obligasyon iti Philippine National Police (PNP) a makitinnulong iti Interpol nu mangiruar ti arrest warrant iti International Criminal Court (ICC) kontra kadagiti pada nga akusado ni sigud a President Rodrigo Roa Duterte, kabilang ni Senator Ronald “Bato” dela Rosa.
Kinuna ni Zamora nga agtaltalinaed nga epektibo iti sangalubongan a legal nga obligasyon ti Pilipinas nga uray immikkaten ti pagilian iti Rome Statute idi 2019.
Pinaglibakan pay ni Zamora iti argumento a ti pannakitinnulong iti panangipatungpal ti warrant manipud ICC ket kaipapanan ti panangisuko ti soberanya ti Pilipinas.
Inallokoy na iti PNP ken dadduma pay a law enforcement agencies nga akmen ti pagrebbengan nga awan ti pab-paboran wenno saan a makibiang iti pulitika.
Nagballaag pay daytoy kontra iti anyaman a panaggandat nga aramiden nga isyu iti pulitika ti proseso iti ICC tapno kalluban iti sungsungbatan dagiti akusado.
Impaganetget ni Zamora nga agtaltalinaed nga adda hurisdiksyon iti ICC kadagiti krimen a naidatag sakbay nga immatras ti Pilipinas iti katulagan.
Kinuna na a ti panagbalin a paset ti Pilipinas iti Interpol ket kaipapanan nga agtultuloy ti panangsurot kadagiti mekanismo a legal iti sangalubongan.
Nagpanawagan pay ni Zamora kadagiti kaalyado ni Duterte a saan nga usaren ti pulitika tapno lisyan iti legal a panagimbestigar ngem ketdi irespeto iti due process.
