Inaklon ti Philippine National Police (PNP) nga awan ti iggem da nga impormasion maipanggep iti lokasion ni Senador Ronald ‘Bato’ Dela Rosa.
Segun kenni PNP acting chief Police Lieutenant General Jose Melencio Nartatez Junior, saan da pay nga ammo iti ayan ti Senador ken awan met ti iggem da nga arrest warrant tapno arestaren da isuna.
Immunan nga imbutaktak ni sigud a Presidential Spokesperson Atty. Harry Roque a naipaulogen iti arrest warrant ni Dela Rosa manipud ti International Criminal Court.
Pinaglibakan met daytoy ti Department of Justice (DOJ) ken ti Department of Interior and Local Government (DILG) nga adda ti iggem da nga arrest warrant maibusor iti Senador.
Maipalagip a paset ni Dela Rosa a naireklamo iti ICC gapu ta nagserbi isuna kas PNP chief iti kangitingian ti pannakaipatungpal ti war on drugs idi panawen ni sigud a Presidente Rodrigo Duterte.#
