LA UNION – Mangisay-sayangkat iti imbestigasyon ti Philippine National Police (PNP) seknan iti napasamak nga accidental firing iti maysa a police instructor ken maysa a trainee ditoy La Union.
Segun kenni PNP Chief General Dionardo Carlos, imbilinna iti panang-repaso dagiti allagaden iti weapons training iti panangisayangkat ti fire exercises, tapno saanen a maulit iti insidente.
Base iti initial report ti PNP Command Center idi Martes manipud Regional Traning Center-1 idiay Aringay, La Union, nagsagrap ti pannaka-sugat da Police Corporal Benie Dupayat ken Patrolman John Conrad Villanueva.
Mangisay-sayangkat ti lecture ni Dupayat iti Basic Parts of Firearms and Gun Safety Rules kadagiti police trainee idi maipagarop a nag-malfunction iti demo gun ket pimmutok iti ima ni Dupayat ket timmama iti luppo ni Villanueva.
Naiturong ken nataming dagiti dua a pulis idiay Caba District Hospital idiay Caba, La Union.
