Nainget a kinondenar ni Philippine National Police (PNP) Chief PGen. Jose Melencio Nartatez Jr. ti mapapati a hazing idiay Philippine National Police Academy (PNPA) iti parbangon ti Abril 10, a pakairamanan dagiti 20 nga underclassmen ken tallo a kadete.
Dagos na nga imbilin ti internal cleansing iti akademiya tapno agbalin nga strikto mainaig ti panagabuso kasaruno ti panangipaganetget iti zero tolerance ti hazing babaen ti Anti-Hazing Act.
Tallo a kadete ti adda iti kustodiya ti Criminal Investigation and Detection Group (CIDG) gapo iti insidente a nagresulta kadagiti paso ken dadduma pay a sugat dagiti nabiktima. Maim-imbestigaran metten dagiti pito nga indibidwal a saan pay a nabigbig.
Nu mapaneknekan ket sumango dagiti suspek ti panaglabsing ti Anti-Hazing Act ken mabalin a ma-kickout iti PNPA.
Agtultuloy a maag-agasan dagiti biktima kasta met a maipapaayan ti psychological support, bayat a naikkaten ti Tactical Officer of the Day idi napasamak ti panagabuso.
