Agtalek ti Philippine National Police (PNP) a matunton ken maaresto ni Senador Ronald “Bato” Dela Rosa iti mabiit, nupay nagtultuloy a saan a nagparang daytoy kadagiti otoridad.
Segun kenni PNP Chief General Jose Melencio Nartatez Jr., saan a mabalin nga aglemmeng iti agnanayon ti maysa a tao a kasapulan nga agsungbat iti linteg, nangruna ta in-inut a malimitaran dagiti lugar a mabalinna a papanan.
Mangnamnama ni Nartatez nga asidegdan a masarakanda ti senador bayat nga agtultuloy ti operasion ken koordinasion kadagiti dadduma law enforcement agencies, partikular dagiti yunit a mangisaysayangkat iti intelligence operations.
Kinuna pay ni Nartatez a mangisaysayangkat dagiti otoridad iti 24-hour operation tapno maadal ken maaksyunan iti tunggal impormasyon a mabalin a mangitudo iti ayan ni Dela Rosa.
Immunan nga impadamag ti PNP a nakaawat daytoy ti nasurok 500 nga impormasion a mainaig iti posible nga pakasarakan iti senador. Nupay kasta, lumasat pay dagitoy iti validation sakbay a sarunuen ti aktual nga operasion.
Malagip a sumangsango ni Dela Rosa iti arrest warrant manipud iti International Criminal Court (ICC) mainaig iti kaso a crimes against humanity a nagramot iti kampania kontra droga ti administrasion ni sigud a Presidente Rodrigo Duterte.
