Imbilin ni Philippine National Police (PNP) Acting Chief PLtGen. Jose Melencio Nartatez Jr. iti naing-inget nga imbestigasion maipapan iti napasamak a shooting incident idiay Sibulan, Negros Oriental a nakaigapuan ti pannakatay dagiti uppat nga indibidual a pakairamanan dagiti tallo a pulis.
Segun kenni Nartatez, rumbeng nga iti isayangkat nga imbestigasion ti Police Regional Office Negros Island Region (PRO-NIR) ket kabaelanna a sungbatan amin nga anggulo iti pasamak ken impaganetgetna nga awan kuma iti agbalin a panangilemmeng wenno cover up iti nauneg nga imbestigasion dagiti imbestigador iti pasamak.
Impalagip met ti hepe kadagiti komander nga ipatungpal ti naing-inget a panagsiput kadagiti personnel tapno mataginayon iti disiplina iti ranggoda.
Kenunana pay a rumbeng a mangisayangkat ti umdas a monitoring kadagiti masakupan ken dagos nga agtignay no adda ti napaliiw a panaglabsing wenno misconduct kadagiti personnel.
Maipalagip nga idi Biyernes ti rabii ket naaddaan ti maysa a shooting incident iti maysa a bar idiay Sibulan a pakairamanan ti maysa a pulis a nangpaltog iti maysa a babai ken tallo a pulis.###
