LA UNION – Immapela ti Police Regional Office One (PRO)-1 iti amin nga umili ditoy Rehiyon Uno, nga itultuloy a tungpalen dagiti allagaden ti General Community Quarantine tapno maliklikan ti sakit ken malapdan ti panagwaras ti coronavirus disease.
Impaganetget iti Bombo Radyo La Union ni PMaj Winnie S. De Vera, Public Information Officer ti PRO-1, nga agtulnog koma latta dagiti tattao iti guidelines ti General Community Quarantine (GCQ) a naipatungpal uray idi nakapasidong ti rehiyon iti ECQ.
Kinuna na, mandatory latta iti tunggal indibiduwal nga agsuot ti face mask, obserbaran ti social distancing, ken saan a rumwar iti balay nu awan ti importante a gagara-en iti ruar.
Apela pay ni De Vera iti publiko nga agbalin a disiplinado tapno malpasen iti sangsangwen a krisis iti COVID 19 pandemic.
