Impasigurado ni Philippine National Police Chief General Jose Melencio Nartatez Jr. nga ipatungpal ti pulisya iti maximum tolerance kadagiti tignay-protesta kagiddan ti maikalima nga State of the Nation Address ni Presidente Ferdinand Marcos Jr. ita nga aldaw, Hulio 27, bayat nga agpanpanawagan ti kooperasion kadagiti rayilista tapno mapagtalinaed iti kinaurnos.
Segun kenni Nartatez, nakasagana ti PNP a mangrespeto iti karbengan ti publiko iti nakappia a panagprotesta, kagiddan ti panawagan a liklikan iti aniaman a riribuk wenno probokasion.
Nasurok a 20,000 a polis ti naidestino iti Metro Manila ken dadduma pay a napateg a lugar kas paset ti panagsagana ti seguridad para iti SONA.
Manamnama iti nalawa a tignay-protesta dagiti nadumaduma a grupo kadagiti naituding a rally sites asideg ti Batasang Pambansa idiay siudad ti Quezon.###
