Naka-full alert iti Philippine National Police (PNP) kas panagsagana iti tallo nga aldaw a rally a mangrugi ita nga aldaw, Nobiembre 16.
Segun ti PNP, pinagtignay dan dagiti kapulisan iti intero a pagilian sipud pay idi aldaw ti Biernes.
Inisial met a naiwaras idi kalman dagiti sumagmamano a panakabagi ti linteg ket iti panagrugi ti rally ita nga aldaw ket addan iti posision iti sibubukel a persua ti PNP.
Kangrunaan a napanan dagiti police units ket kadagiti etratehiko a lokasion idiay Metro Manila a pakaisayangkatan ti rally, bayat a dagiti regional office met iti pagilian ket nabilin a papigsaen dagiti security operations kadagiti masakupan da.
Iti maysa nga statement, imbaga ni PNP chief PLt.Gen. Jose Melencio Nartatez Jr. a naka-activate iti comprehensive security plan a buklen dagiti ground operations, panangmanehar iti taray ti trapiko, intelligence monitoring, emergency response karaman ti maritime patrols.
Impaganetget ti PNP chief a raraemen da iti karbengan ti publiko a mangisayangkat ti nakappia a panagtitipon, ngem pinaregtana dagiti dumar-ay iti rally a suruten dagiti safety reminders ken makitinnulong iti pulisya nga adda iti ground. #
