Agtalek iti liderato ti Philippine National Police a saanda a kasapulan a selioan dagiti service firearms dagiti personnel ita nga holiday season.
Segun kenni PNP Public Information Office Chief, Police Brig. Gen. Randulf Tuaño, iti intero nga organisasion ti Philippine National Police ket propesional a pannakabagi ti linteg.
Iti nakasanayan a panangikabil ti muzzle tape wenno tape iti murdong ti paltog kadagiti service firearms dagiti pulis ket saanen nga inraman ni Acting PNP Chief, Police Lt. Gen. Jose Melencio Nartatez Jr. iti inruar na a memorandum para iti paskua.
Naaramid daytoy a desision kalpasan ti inter-agency meeting wenno panagtaripnong dagiti nadumaduma nga ahensia ti gobierno, kaduai ti Department of the Interior ken Local Government (DILG) idi napalabas a lawas.
Natalantan iti panagtaripnong dagiti addang tapno masigurado iti seguridad ken kinatalged ti publiko iti panawen ti holiday season.
Naudi a naipatungpal idi 2023 iti nainget a pannakaselio dagiti service firearms nga addaan panggep a maliklikan iti indiscriminate firing kangrunaan iti panangpasungad ti Baro a Tawen.
Nainget met a binilin ni Nartatez dagiti amin a commander iti ground wenno lider dagiti nadumaduma nga estasion ti polisia ken yunit iti dagos a risuetn dagiti amin a kaso ti stray bullet wenno naiwawa a bala iti uneg ti 24 nga oras.#
