Personal a nagturong dagiti personnel ti Police Regional Mobile Force Battalion 1 (RMFB1) iti San Fernando Town Plaza tapno mangisagut kadagiti sabong ken tsokolate kas simple a panangipakita iti panangipateg ken panagraem kadagiti babbai ita a Valentine’s Day.
Saggaysa nga inasitgan dagiti pulis dagiti babbai — dagiti magmagna, agpaspasiar, ken uray dagiti madama ti trabahona iti lugar.
Panggep ti nasao nga aktibidad a mapatibker iti relasion ti pulisya ken ti komunidad, ken maipakita a malaksid iti pannakataginayon ti talna ken urnos, napateg met a maipariknada kadagiti umili a maseknan ken maapresiarda.
Nangipeksa met ti panagyaman dagiti nakaawat ti sagut a nangnayon ti ragsak kadakuada ita nga aldaw.
Para iti kaadduan, dagiti simple a sabong ken tsokolate ket simbolo ti pannakabigbig dagiti babbai ken mangipalagip iti positibo a kaadda dagiti pulis iti komunidad.###
