Pimmusay ti maysa a police trainee gapu ti maipagarop a pannakabannog na idiay Regional Training Center 1, Barangay Poblacion, Aringay. La Union.
Nabigbig ti biktima a ni Nico Dulay, 27 anyos, miembro ti PSBRC Class 2022-02 “Alab Masidlab,” ken residente ti Barangay Carlatan, San Fernando City, La Union.
Maibasar iti nakalap a report ti Bombo Radyo News Team, agarup 8:30 ti bigat idi July 8, 2023, naiturong ti biktima iti Caba District Hospital, Caba, La Union, kalpasan ti 21-kilometer Graduation Run da gaputa marigatan nga agangies kaduana ni PSSg Jennifer Sarsoza, duty nurse ken dadduma pay a training staffs iti uneg ti RTC1 Patrol Car.
Apaman a makasangpetda iti nasao nga ospital, nadakamat a ti biktima ket ket nagsagaba iti intravenous fluid medication ken close monitoring isuna iti Emergency Room.
Kalpasan na, naiyakar manen isuna agarop alas 12:45 ti malem ti nasao a petsa iti La Union Medical Diagnostic Center and Hospital, ditoy syudad nga awan ti puot na kas bilin ti doctor para iti kanayunan a pannakaagas na.
Alas 2:50 ti malem naiyakar ulit ti biktima iti maysa a pribado nga ospital ken naiturong iti ICU gaputa awan pay laeng ti puot na.
Alas 6:02 ti rabii idi met laeng July 8 naideklara a pimmusayen ti biktima babaen iti atteding physician na a Dr. Christian Gurion.
Kabayatan na, agtultuloy latta nga am-amuen dagiti otoridad ti puon ken gapu ti pannakatay ti nasao a police trainee.
Pinadas met nga alaen ti reaction ti Bombo Radyo News Team ti pamilya ti biktima ngem nagkedked dagitoy.
