LA UNION – Mararaem ita iti maysa a policewoman manipud San Juan Police Station gaputi panang-tulong na iti maysa a misis nga agpasngay.
Agtultuloy nga umaw-awat ti pammadayaw manipud kadagiti netizens ken kadagiti katrabahuanna ni Patrolwoman Lyanne Queen Karganilla, Assistant WCPD ti San Juan Police Station.
Iti eksklusibo a pannakiuman iti Bombo Radyo La Union kenni Karganilla, kinuna na a nagpaarayat kadakuada iti agassawa a Nalam manipud Brgy. Catdongan ti nasao nga ili, agsipudta makaan-anaken iti babai ket saan-nan a maidanon pay iti ospital ti panagpasngay daytoy.
Nagsardeng ti nagluganan a jeep dagiti agassawa iti batog ti San Juan Police Station idi rabii ti Martes tapno kumiddaw ti tulong.
Saan met a nagpangngadua ni Karganilla a tulongan ti misis nga uray awan ti kapadasan na nga agpa-anak ket inaramid na iti kabaelan.
Maragsakan met ti nasao a pulis kalpasan a natalged ken balligi a nagpasngay ti misis iti maysa a baby girl.
Ni Patrolwoman Karganilla ket tallo tawenen iti serbisyo.
Iti met misis a nagpasngay ket nabigbig a ni Annabelle Nalam, 26-anyos, residente iti Brgy. Catdongan, San Juan, La Union.
