Inwaragawag ti Malacañang a mabalin nga ibilang a “breach of public trust” no adda ti impormasion ni Bise Presidente Sara Duterte maipapan iti posible a gubat idiay Middle East idi ngem saanna nga indanon iti gobierno.
Ti nasao a waragawag ket kalpasan iti statement ti Bise Presidente a nabayagnan a mangmangeg iti posibilidad ti gubat iti rehiyon, uray pay idi 2022.
Segun kenni Palace Press Officer Undersecretary Claire Castro, no adda ti kastoy nga impormasion ti Bise Presidente, maibinglay koma a dagus iti Presidente ken kadagiti maseknan nga ahensia tapno makapagsagana iti gobierno.
Innayon pay ti Malacañang, ti saan a panangibinglay iti napateg nga impormasion ti maysa nga opisial ti gobierno ket mabalin a maibilang a nonfeasance, wenno pannakapaay nga aramiden ti public duty.
Impaganetget ni Undersecretary Castro nga idi 2022 ket agkadua pay nga agkamkampanya da Duterte ken Presidente Ferdinand Marcos Jr. babaen ti UniTeam, isu nga addaan ti gundaway iti Bise Presidente nga idanon iti nasao nga impormasion iti Presidente wenno ti Department of National Defense.###
