LA UNION – Agdama nga ad-adalen ti Land Transportation Franchising and Regulatory Board (LTFRB) no nasken iti panangipangato ti plete kadagiti Public Utility Vehicles (PUVs), kasaruno iti agtultuloy a panagngato ti presio ti gasolina.
Segun ti ahensia, panggep ti panagadal a maammuan no umdas iti agdama a fare matrix tapno mabayadan ti umad-adu a gastos iti panagbiahe dagiti lugan.
Iti biang ti gobierno, ikagkagumaanda a papartaken iti pannakaiwara ti fuel subsidy para kadagiti kualipikado a drivers ken operators.
Kenuna ni Cristal R. Sibayan, Regional Director ti LTFRB Region 1, a no plano dagiti transport group ti mangisubmitir iti petition para ti pannakaipangato ti plete ket mabalinda laeng iti mangipatulod ti surat iti LTFRB Region 1, ken isudanton ti mangipasa iti Central Office para iti kasapulan a panagadal ken panagaprobar.
Iti agdama, agtultuloy iti pannakasurot ti agdama a fare matrix gapu ta awan pay ti opisial nga inaprobaran a panagngato ti plete.
Pinaregta ti LTFRB dagiti drivers ken operators a suroten iti naikeddeng a plete ken liklikan iti panagsingir ti nangatngato ngem iti inkeddeng ti ahensia.
Impakdaar ti LTFRB a mabalin a masuspende iti prangkisa dagiti driver a napaneknekan a nalabes iti panagsingirda ti plete uray no awan pay ti naipatungpal a pannakaingato ti plete.
No bilang man makapadas dagiti pasahero ti nangatngato a plete, maibalakad kadakuada nga irekord ti plate number ken detalye ti prangkisa ti lugan, ken mangipila iti reklamo iti opisina ti LTFRB.
Innayon ti ahensia a mabalin met a kiddawen dagiti pasahero ti fare matrix manipud kadagiti driver tapno makitada ti opisial a plete.
Iti baet ti agtultuloy a panagngato ti presio ti lana iti sangalubongan a merkado, gapu iti agdama a tension ken gubat kadagiti dadduma a pagilian, aminado ti LTFRB a kangrunaan a maapektaran iti sektor ti transportasion.###
