Nagpanawagan ti Philippine National Police (PNP) iti opisina ti Department of Social Welfare and Development (DSWD) para iti nasayaat a koordinasion ken nainget a pannakitinnulong tapno maliklikan ti posible a pannakapunno ken linnetlet kadagiti youth shelters iti tengnga ti nainget nga implementasyon ti enhanced curfew hours kadigiti komunidad.
Segun kenni PNP Chief PGen. Jose Melencio Nartatez Jr., panggep daytoy a maipakita nga iti implementasyon dagiti ordinansa ket tapno masalakniban iti agtutubo ken saan a tapno magaburan dagiti agraraira a sistema.
Impasigurado ti PNP nga amin dagiti agtutubo a makemmeg manipud ti panaglabsing kadagiti curfew hours ket makaawat ti umno a panangtaripato kadagiti youth shelters.
Maipalagip nga adda dagiti sumagmamano a grupo iti nangparegta kenni Department of the Interior and Local Government Secretary Juanito Victor “Jonvic” Remulla a baliwan a panunuten iti panangipatungal ti nalawa a curfew hours gapu iti posibilidad nga agtennag kadagiti panagabuso ken panagaresto.
Kabayatanna, inlawlawag ni Nartatez nga iti panangipatungpal dagitoy nga addang ket tapno annadan ken salakniban dagiti agtutubo manipud kadagiti dakes a tattao ken dagiti sindikato, ken tapno saan nga agbalin a wagas ti panangdusa kadakuada.###
