LA UNION – Sumagmamano nga oras sakbay iti panaglandfall ti bagyo Ompong agtultuloy ti preemptive evacuation kadagiti residente nga asideg iti coastal areas ti sibubukel a Region 1.
Segun kenni Mike Sabado, spokesperson ti Office of the Civil Defense Regional Office 1, dumanonen iti 5,431 individuals wenno 1,271 families ti agtaltalinaed kadagiti evacuation center iti uppat nga probinsya iti rehiyon.
Kaaduan ditoy ket naggapu iti coastal area idiay probinsya ti Ilocos Norte, partikular idiay Pagudpud, Batac, Pasuquin, ken idiay Tagudin, Candon City, Cauayan, Vigan, Narvacan, Sta Maria, ken Suyo idiay Ilocos Sur, Bangar, Bauang ken San Fernando City idiay La Union, ken Pangasinan, idiay Dagupan City ken San Fabian.
Saan pay nga karaman dagiti immakaw manipud iti ili ti Luna nga addaan 830 families manipud iti innem a barangay ken 163 families iti dua nga ili ti Balaoan nga adda iti coastal areas.
Kabayatan na, one lane passable iti Ilocos Norte-Apayao road ken Bauang-Baguio road gapu ti sumagmamano a road constructions.
Malaksid iti daytoy, makapaspasar metten ti storm surge wenno dadakkel nga dalluyon ti sumagmamano a coastal area idiay ili ti Luna gapu iti light to moderate rain ken rough to very rough nga kabaybayan.
Nupay kasta, mabalin met a manayunan pay ti nasao a bilang dagiti evacuees gapu iti agtultuloy a panangiyakar kadagiti residente.
Iti agdama, nakaibayog iti signal # 3 ti La Union gapu iti bagyo Ompong a manamnama nga aglandfall idiay Cagayan inton ala 1 agingga alas 3 ita nga parbangon.
