Nakatuding a rugian ti Office of the Ombudsman ita a lawas iti panangisayangkat ti preliminary investigation para kadagiti innem a kaso ti flood control projects anomaly, partikular idiay Oriental Mindoro ket ‘ghost projects’ idiay Bulacan.
Immunan a nagsubmitir ti rekomendasion iti Independent Commission for Infrastructure tapno mapilaan ti kaso a kriminal da sigud nga Ako Bicol Party-list Representative Zaldy Co, sumagmamano nga opisial ti Department of Public Works and Highways, karaman dagiti kontratista.
Impasa met ti Department of Justice dagiti ‘findings’ da iti imbestigasion.
Kabayatanna, inaklon ni Ombudsman Boying Remulla a saan laeng a daytoy a kaso iti rumbeng nga ipamaysa ken ikkan atension, agsipud ta adda pay iti isyu maipanggep ti ‘restitution’ – a tarigagay na a maipaayan ti palawag ken maurnos no kasano nga aramiden iti proseso.
Makikoordinar ken makisarita isuna iti Sandiganbayan wenno Hudikatura gapo ta posible a maaramat daytoy kas estratehiya ti gobierno.
Malaksid iti Sandiganbayan, kayat ni Remulla a dumatag iti Korte Suprema tapno makaala ti kanayunan a pagaammo maipanggep iti restitution ken kaso.###
