Nakatuding nga ituloy ita nga aldaw ti Department of Justice (DOJ) ti preliminary investigation ti kaso a plunder kontra ti sigud a Senador Bong Revilla Jr.
Maipalagip a natantan ti panagdengdengeg kalpasan a mangipila ti mosyon ti National Bureau of Investigation (NBI), nga isu’t nangipila ti reklamo. Naangay kuma daitoy idi Pebrero 20, ngem naitantan tapno maikkan ti umdas a panawen dagiti amin nga naireklamo a makaisagana kadagiti sungbat da.
Iti mosyon ti NBI ket nangnayon da kadagiti nagnagan kas baro a respondents kontra kenni Revilla ken dadduma pay nga akusado.
Segun kenni DOJ Spokesperson Polo Martinez, karaman iti reklamo dagiti uppat a sigud nga opisyales ti Department of Public Works and Highways (DPWH) partikular dagiti engineers nga isuda Denryl Caesar Cortuna, Manny Bulusan, Ruel Umali, ken Arturo Gonzales Junior.
Gapo kadagiti kabaroan nga eidensya ken kanayunan a respondents ket mabalinen a mangisubmitir ni Revilla ti supplemental counter-affidavit kas sungbat kadagiti nainayon a reklamo.
