BR LA UNION – Impaganetget ti Malacañang a saan a ninamnama ni Presidente Ferdinand “Bongbong” Marcos Jr. a ti agbalin a bise presidente na ket saan a tumulong iti administrasyon, ngem ketdi isuna pay ti mangbat-batikos iti gobyerno.
Segun kenni Palace Press Officer USec. Claire Castro a laksid dagiti pasamak, saan nga agbabawi ti Presidente iti napasamak ken agtalinaed a nakasentro ti atensiyon na iti panagtrabaho para iti ili.
Innayon pay ni Castro, saan man a makatulong ti bise presidente, agtultuloy met iti panangtungpal ti Presidente iti pagrebbengan na para iti pagimbagan dagiti umili.
Sungbat daytoy Castro iti salodsod, nu agpada ngata iti marikrikna ni VP Sara a kimmiddaw ti dispensar nu natulongan na a nangabak ti Presidente, iti met sentimyento ti Chief Executive.
Maipapan iti panangideklara ni VP Sara ti kandidatura na inton 2028, imbaga ti Malacañang nga adda kadagiti umili a manghusgar kadagiti kandidato ken inallokoy na iti publiko nga agbalin a nasirib iti panagpili ti sumaruno a lider ti pagilian.
