BR LA UNION – Inyanunsiyo ni Presidente Ferdinand Marcos Jr., a mangrugi inton bigat Martes, Abril 14, maipatungpal ti dakkel a rollback iti presyo ti langis.
Umabot iti nasurok P20 ti bumabaan ti presyo iti diesel bayat a P4.43 ti maikissay iti kada litro ti gasolina.
Kabayatanna, bumaba met ti P8.50 kada litro iti presyo ti kerosene.
Kinuna ni Presidente Marcos a dakkel a gin-awa daytoy para kadagiti driver, commuter, ken pamilya a Pilipino nga agtultuloy nga apektado ti nangato a presyo ti krudo.
Nupay kasta, inaklon ti Presidente a saan nga umdas dagiti nadakamat nga addang. Impaganetgetna nga agtultuloy ti panagtrabaho ti gobierno tapno makissayan ti epekto ti panagngato ti presyo dagiti magat-gatang iti inaldaw a panagbiag dagiti umili.
Impaganetget na pay a saan nga agsardeng ti gobierno agingga a maipababa ti gastos iti transportasyon, taraon, ken dadduma pay a kangrunaan a kasapulan.
Innayon ti Presidente a namnamaen nga adda pay sumarsaruno nga anunsiyo iti sumarsaruno nga aldaw ken lawas kas agtultuloy nga addang ken tulong manipud iti gobierno.
Impasigurado ni Presidente Marcos a saan a mabay-bay-an ti tunggal Pilipino iti tengnga dagiti karit, ken agtultuloy ti panagregget ti gobierno tapno maiparikna ti gin-awa iti tunggal pagtaengan.
