Impaganetget iti Presidente ti International Criminal Court (ICC) a saan a rumbeng a mawaswas ti korte, kasaruno ti panangipataw ti Estados Unidos dagiti sansions maibusor kenkuana ken ti maysa a senior trial lawyer ti institusion.
Kinuna ni ICC President Judge Tomoko Akane idi Mierkoles a masapul nga idepensa dagiti miembro a pagilian iti korte ken iti mandato daytoy a pagsungbaten dagiti responsable kadagiti kadagsenan nga internasional a krimen.
Idi Agosto 18, inkabil ti Trump administration da Akane ken ICC Senior Trial Lawyer Abdoulaye Seye iti sidong ti sansion, kas paset ti kampania ti Washington maibusor iti korte.
Inkonektar ti Estados Unidos dagiti addang daytoy kadagiti imbestigasion ti ICC, agraman iti arrest warrant maibusor kenni Israeli Prime Minister Benjamin Netanyahu mainaig kadagiti alegasion a war crimes ken crimes against humanity idiay Gaza.
Inallukoy ni Akane nga usaren ti Japan iti relasion daytoy iti Estados Unidos tapno makatulong a mangpalag-an iti tension ken allukuyen dagiti dadduma a pagilian a miembro ti ICC nga agtultuloy a suportaran iti korte.
Kabayatanna, inyebkas ti Japan ken Netherlands iti suportada iti ICC ken pannakaseknanda kadagiti sansion, idinto a kinuna a mismo ti korte a dagiti addang maibusor kadagiti hues ken piskal ket mamagpeggad iti panagwaywayas ti hudisial a sistema ken ti internasional a turay ti linteg.###
