LA UNION – Naisublin iti pagbaludan iti preso a naglibas idi kalman iti Bacnotan Police Station idiay ili ti Bacnotan, La Union.
Naamwan ti Bombo Radyo La Union a natiliw idi rabii iti suspek a ni Julius Nieva idiay ili met laeng ti Bacnotan kalpasan iti insayangkat dagiti otoridad a nairut a pananganop, ngem naiyakar iti pakaibaludan na idiay San Juan Police Station.
Maipalagip a nagpammarang iti suspek a makarikrikna iti nakaru a panagsakit ti tiyan, isunga linukatan ti maysa nga on-duty non-uniformed personnel iti selda na tapno pusasan koma iti pulis sakbay a maiturong iti ospital.
Ngem iti saan a ninamnama, kellaat nga induron iti napigsa ti suspek iti nasao nga NUP ken awan met ti naaramidan iti pulis a mangposas koma iti preso.
Ni Nieva ket sumangsango ita iti agtutuon a kaso kalpasan a naglibas, malaksid laeng iti immunan a kaso daytoy a panaglabsing iti RA 9165.
Kabayatanna, na-relieve iti puwesto iti sigud a hepe ti Bacnotan Police Station a ni Pol Capt. Virgilio Cruz gapu iti nasao nga insidente.
Iti agdama, ti nadutukan iti nasao a posisyon ket ni Pol. Maj. Luis Liban.
