Maysa nga aldaw sakbay ti Undas, dupudop dagiti aggatang ti sabong, kandila, ken dagiti kankanen iti merkado publiko ti San Fernando City, La Union.
Gapu iti daytoy, sibibiag ti negosyo iti ciudad gapu iti pannakakumiko dagiti flower vendors iti panangaramid kadagiti sabong para kadagiti nagpareserve kadagitoy.
Magatang ti maysa a basket ti sabong iti gatad a P100 pesos agingga P550 depende iti kadakkel daytoy.
Segun kadagiti flower vendor, awan ti epekto na daytoy iti supply agsipudta supisyente.
Mainaeg daytoy, ngimmato met iti presyo dagiti kandila no sadino magatang dagitoy iti gatad a P35 pesos agingga 70 pesos depende iti kadakkel na.
Kabayatan na, malaksid iti sabong ken kandila ngimmato met iti presyo dagiti magatang a kankanen no sadino maysa daytoy kadagiti maiyatang no aldaw dagiti natay. Magatang dagitoy iti gatad a P30 agingga P250 pesos depende iti klase dagitoy.
Namnamaen nga inton bigat ket mas lalo pay nga agdudupudop dagiti tao iti nadumaduma a pagtagilakuan tapno gumatang kadagiti sagot kadagiti pimmusay nga ay-ayaten iti biag.
