LA UNION – Bimmaba iti presyo ti semento ditoy lokalidad gaputa bimmaba iti pagkasapolan wenno demand.
Base daytoy iti naudi a price monitoring ti Department of Trade and Industry – La Union Provincial Office.
Segun kenni Senior Trade and Industry Specialist Marissa Nonesa ti Consumer Protection Division ti DTI La Union, agpar-parang a P5 iti bimmabaan ti presyo iti dua a brand ti semento.
Kinuna na a ti sigud a P215 per bag ti semento ket agbalor itan ti P210; bayat a ti sigud a P220 ket magatang laengen ita iti P215.
Ngem adda iti maysa a brand ti semento a nagtalinaed iti presyo na, agraman dagiti dadduma a construction materials.
Immunan nga impadamag ti DTI La Union a naggaraw ti presyo iti sumagmamano a prime ken basic commodities, a kas iti sardinas, noodles, suka, patis, soy sauce, beef loaf, ken dadduma pay.
Masansan a makagapo iti panagngato dagiti nasao a produkto ket gaputa ngumina met dagiti raw materials a maus-usar iti panagpartuat iti produkto nangruna nu imported dagitoy.
