Dandani nagdoble wenno triple iti presio dagiti sumagmamano a nateng iti San Fernando Public Market, gapu iti agtultuloy a panagtudo ken epekto ti southwest monsoon a nangapektar iti produksion dagiti mannalon ditoy probinsia.
Segun kadagiti aglaklako, bimmasit iti suplay ti nateng gapu ta ado a mula iti nadadael wenno narunot a rason tapno bumaba iti suplay ti nateng iti merkado bayat a nagtalinaed a nangato ti demand.
Kagiddan ti panagngato ti presio, nagbannayat met iti panaglako gapu ta adda dagiti saan a makabael iti presio dagiti kangrunaan a nateng.
Segun kenni Ranny Balanon, Lowland Vegetable President ti San Fernando Public Market, kasapulan nga agsapulda iti sabali a wagas tapno saan a masayang dagiti tagilakoda, nangruna dagiti nateng a saan dagus a mailako.
Kinunana a dagiti nateng a saanen a mailako iti merkado ket maiyeg wenno mailako kadagiti am-ammoda ken dagiti agnanaed iti barangayda, idinto a dagiti produkto a naan-anay a nadadael ken saanen a mabalin a kanen ket kapilitan a maibelleng.
Nupay kasta, kinuna ni Balanon nga agtaltalinaed nga umdas iti matgedanda para iti inaldaw a panagbiag, nupay nababbaba ngem kadagiti napalabas.
Mangnamnama dagiti aglaklako a sumayaat iti kasasaad ti paniempo tapno maisubli iti normal ti produksion ken suplay dagiti nateng, ken tapno bumaba met iti presio kadagiti merkado. (Bombo Ericka Quinzon)
