LA UNION – ‘Very challenging ngem napintas iti teaching profession.’
Daytoy iti kinuna ni Principal Arlyn Bambico ti Lingsat Integrated School kagiddan iti panang-rambak ita nga aldaw, Oktubre 5, iti World Teacher’s Day.
Kabayatan iti interview ti Bombo Radyo La Union kenni Principal Bambico, kinuna na nga agpaysu a narigat iti agisuro, ngem kas met laeng iti dadduma a propesyon, kasapolan iti gaget, dedikasyon, anus, ken buyogan iti panagkararag, tapno maipatungpal a naimbag iti mandato iti anyaman a sinapataan a propesyon.
Dagitoy kunana iti sikreto tapno agballigi iti anyaman a sinerrek a propesyon ken trabaho.
Iti rebelasyon ni Ms. Bambico, saan a panagisuro iti first dream na a pagbalinan.
Kinunana a kayatna idi iti agbalin a broadcaster, ngem pinanunot na iti naited kenkuana a napintas a gundaway ken oportunidad, kas maysa nga scholar iti benneg ti edukasyon.
Impangrunana iti tarigagay na a makastrek a dagus iti trabaho, agsipudta apaman nga agturpos iti nasao a kurso, ket addan iti dagus nga agur-uray kenkuana a trabaho.
Segun pay kenni Bambico, nangrugi nga agisuro iti pribado a pagadalan idi 1992 iti uneg ti innem a tawen; simmaruno a nagisuro, nagbalin a classroom teacher, department head iti English Division iti nasurok 10 a tawen ken nagbalin nga Assistant Principal iti La Union National High School para iti nasurok 11 a bulan idi 2017.
Idi September 2018, napasamak iti reshuffle kadagiti school heads ket maysa isuna kadagiti naiyakar agingga a naipatugaw a principal iti Lingsat Integrated School agingga iti agdama.
Kinunana nga adu ti karit ken pannubok iti teaching profession nangruna idi panawen ti pandemya, ngem nalasatan da daytoy ket ingkari na nga itultuloy da a tulongan ken edukaran dagiti ubbing ken agtutubo.
