BR LA UNION – Posible nga urnosen nga umuna ti sumagmamano a mosyon ken procedural issues iti umuna nga aldaw ti impeachment trial kontra kenni VP Sara Duterte.
Segun kenni House Prosecution spokesperson Ace Barbers, kasapolan nga agbalin a solido iti taray ti trial ken masiguro nga awan ti anyaman a procedural lapses wenno legal a problema tapno agtultuloy ti trial.
Ti panangresolba wenno panangurnos nga umuna iti sumagmamano a procedural issues kunana ket napateg nga addang sakbay a rugyan iti panag-presenta dagiti ebidensiya ken testigo, a mabalin a maisayangkat iti sumarsaruno nga aldaw.
Mangrugi inton Lunes (July 6), iti trial kontra iti bise presidente ken manamnama nga agpaut ti panagusig iti nasurok pito a bulan.
Segun kenni Barbers, plano ti amin a prosecutor a dumar-ay iti umuna nga aldaw ti panagdengngeg, agraman dagiti baro a private prosecutor a saan pay a nakai-serrek ti ‘entry of appearance’.
Impaganetget ni Barbers, nakasaganan ti panel nga agipresenta ti ebidensiya ken testigo, ken iti posibilidad nga agpaut ti trial.
Iti agdama kunana, adda panagkaykaysa iti baetan dagiti abogado, laksid iti bilang ken nagduduma a legal background.
