Nakasagana ti House prosecution nga usaren dagiti liquidation reports a nagtaud iti Office of the Vice President (OVP) tapno maliklikan iti nabayag a panagsupiat iti authentication dagiti dokumento iti impeachment trial ni Bise Presidente Sara Duterte.
Segun kenni House prosecution legal spokesperson ken private prosecutor Atty. Benjamin “Jay” Tolosa Jr., naisubmitir iti Commision on Audit (COA) dagiti nasao a dokumento, isu a mabalin a pagsaritaan pay nga umuna ti prosecution ken defense no ania kadagiti record da iti agpapada ken mabalin nga awaten ti nagsinnungbangir a dasig.
Kenuna ni Tolosa a napateg daytoy gapu ta rinibo a dokumento iti paset ti ebidensia iti Article I, a mangtaltalantan iti maipagarup a biddut a panagusar ken irregular a panag-liquidate ti ₱612.5 million confidential funds ti OVP ken Department of Education (DepEd).
No awan ti panagtunos iti authenticity dagiti records, mabalin pay met a paneknekan ti prosekusion dagitoy iti open court, ngem manamnama nga agpaut pay iti panagusig.
Kabayatanna, manamnama a maisalang iti nainget a panagdamag ti prosecution da Gina Acosta ken Edward Fajarda, dagiti nagbalin nga Special Disbursing Officers (SDO) ti OVP ken DepEd.
Maibilang da a posible nga hostile witnesses ti prosecution gapu ta mabalin a saan a pabor iti dasig daytoy iti testimonya da.
Napateg dagiti salaysay da iti panangammo iti nagbalin a taray ti confidential funds kalpasan a ma-withdraw, karaman iti no sino ken kasano daytoy a naipasa agingga iti liquidation.
Maibasar iti immuna a testimonya da Acosta ken Fajarda iti House inquiry, agpada da nga imbaga nga iti kadakkelan a gatad ti confidential funds ket naipasa kadagiti security officers kalpasan iti withdrawal.
Mabalin met a mangusar iti prosekusion ti leading questions no palubusan dagiti alagaden ti impeachment trial, bayat nga iti kadagsen ken kredebilidad ti testimonia ket agtaltalinaed a pagdesisionan dagiti senator-judge kadua dagiti dadduma nga ebidensya, kas iti bank records, liquidation documents ken COA findings.###
