BR LA UNION – Impaganetget ni Trial spokesperson ken Kabataan Partylist Rep. Renee Co a saan nga ipalubos ti House prosecution panel ti anyaman nga addang a mabalin a mang-delay wenno mangpabuntog iti impeachment trial ni Vice President Sara Duterte.
Segun kenni Co, adda pagrebbengan ti Senado nga ituloy ti panagusig maiyannurot iti itud-tuding ti Konstitusyon ken siguradwen nga awan ti agbalin a lapped iti proseso ti sungsungbatan dagiti opisyal ti gobyerno.
Impaganetget ti House prosecutors a ti anyaman a delay iti panagusig ket mabalin a mangigubway ti pannaka-dismaya iti publiko, nangruna ket nabayagen nga ur-urayen dagiti umili ti panagdengngeg kadagiti alegasyon kontra iti bise presidente.
Kabayatanna, namnamaen a mangrugi ti impeachment trial idiay Senado inton Hulyo 6, 2026 kalpasan ti panagbaliw iti liderato iti akin-ngato a pagpandayan linteg.
Kabilang dagiti kaso a sangsangwen ni Duterte dagiti alegasyon a biddut a pannakausar ti pondo ken dadduma pay a maipagarop a pananglabsing iti talek ti publiko, banag a pinaglibakan ti bise presidente ken ibilang na dagiti akusasyon kenkuana nga adda maris pulitika.
Agtultuloy met ti panagsagana ti House prosecution panel kadagiti ebidensiya ken testigo bayat a maur-uray ti pormal a panagrugi ti panagusig idiay Senado.
Kabayatanna, kinuna met ni Rep. Zia Alonto Adiong a nupay sumur-surot ti depensa iti pammilin ti impeachment court, agtaltalinaed a salodsod nu nakasagana daytoy a mangipaay ti detalyado a palawag ken ebidensiya a mangsungbat kadagiti alegasyon ti prosekusyon.
Segun kadagiti prosecutor, iti agdama ket ballaygi iti nagbalin a pre-trial process, ngem ur-urayen da pay iti mas substantibo a sungbat ti depensa kadagiti isyu a maibatbato kontra iti bise presidente.
Mamati da Rep. Renee Co ken Rep. Zia Alonto Adiong a saan nga umanay iti panangsurot laeng ti kampo ni Vice President Sara Duterte kadagiti proseso ti impeachment court nu awan met iti nalawag a palawag kadagiti alegasyon kontra kenkuana.
