Maipagarup nga agbalbalin a dalan dagiti fake news ken disinformation iti agtultuloy nga impeachment process kontra kenni Bise Presidente Sara Duterte.
Segun kenni Cleve V. Arguelles, political scientist ken presidente ti WR Numero, rumbeng a pagdanagan daytoy ti House prosecution team ken ti Senate impeachment court bayat nga agsagsagana iti pagilian iti maysa kadagiti kapudutan a panagusig iti pakasaritaan ti politika.
Kenuna ni Arguelles a manipud iti House impeachment proceedings agingga iti panag-convene ti impeachment court, agrairan dagiti biddut nga impormasion manipud kadagiti nadumaduma a platform.
Maipalagip a nagbotos iti Kamara ti 257-25-9 tapno i-impeach ni Duterte ken isubmitir iti Senado ti Articles of Impeachment.
Agdama nga agserserbi kas impeachment court iti Senado mainaig dagiti alegasion kontra kenni Duterte, karaman iti maipagarup a biddut a panagusar ti pondo, saan a mailawlawag a kinaknang, ken dagiti pangtana kontra kenni Presidente Ferdinand Marcos Jr. ken dadduma pay nga opisial—dagiti akusasion a pinaglibakan ti Bise Presidente.
Innayon na pay a naiduma iti agdama nga information environment gapu ta malaksid iti tradisional a media, dakkel met iti impluwensia ti social media, partisan networks, ken real-time online narratives.
Maibasar iti datos-da, adda iti 50 porsiento dagiti Pilipino iti mangibagbaga a kurang iti ammoda kadagiti ebidensia kontra iti Bise.
Nagpakdaar met isuna a nalaka a maimpluwensiaan ti manipulado a naratibo ken propaganda a pampulitika iti publiko, kangrunaan iti tengnga ti nakaro a political polarization ken saritaan iti 2028 presidential race.###
