Nakapamaysa iti National Capital Region Police Office (NCRPO) kadagiti pampubliko a lugar ken kalsada idiay Metro Manila para iti manamnama a sentro dagiti tignay-protesta ita nga aldaw iti Lunes, Setyembre 21, mainaig iti maika-54 nga anibersaryo iti deklarasyon ti Batas Militar, wenno Martial Law.
Karaman kadagiti nabantayan ket dagiti sumagmamano a paset ti EDSA, Chino Roces Bridge (Mendiola), J.P. Laurel Street, Ayala Bridge, ken dagiti kabangibang a lugar asideg ti Technological Institute of the Philippines (TIP) Manila, San Sebastian Church, kasta met idiay University of the East (UE).
Sakbayna ket personal nga indauloan ni NCRPO Officer-in-Charge Police Brigadier General Christopher Abrahano iti walkthrough ken ocular inspection kadagiti kangrunaan a kalsada idiay Maynila tapno kitaen iti seguridad ken posible a ruta dagiti demonstrador.
Segun kenni Abrahano, napateg iti nasapa nga inspeksyon tapno masiguro a naannayas iti agbalin a taray ti trapiko kasta met a maipasiguro ti kinatalged iti publiko.
Nagpalagip met isuna kadagiti pulis nga agtalinaed nga alerto kabayatan iti panagraem kadagiti karbengan dagiti umili iti nawaya a panaguummong ken panagwaragawag.
