LA UNION – Indeklara ti Provincial Government ti La Union iti Provincewide Suspension iti klase iti amin a tukad kasta metten trabaho iti amin nga opisina ti gobyerno, manipud ita nga aldaw Oktubre 30 agingga 31 ti agdama a tawen.
Nakapauneg daytoy iti naiyisyu nga EO No. 19 series of 2018 nga addaan ranta a maikkan ti safety precaution dagiti maseknan seknan iti posible nga epekto ti bagyo Rosita.
Iti met trabaho iti pribado a sektor ket naitalek kadagiti bukod da a management.
Nupay kasta, agtalinaed a naka-alerto 24/7 ken tuloy iti operasyon dagiti kameng wenno mangbukbukel kadagiti disaster risk reduction and management offices ditoy probinsiya, tapno siguradwen a maidanon iti kasapolan a tulong ti publiko.
Kabayatanna, gapu iti nasao a suspensiyon, ket maaddaan iti napapaut a bakasyon dagiti estudyante ken mangmangged gaputa inton Huwebes (November 1) ken Biyernes (November 2) ket deklarado met nga Special Non-working Holiday.
Nupay kasta, agbalin a lapped iti napaut a bakasyon iti agpangpangta a panagduprak ken peligro a gubwayen ti bagyo Rosita.
Iti agdama, awan pay iti mapaspasaran a panagtudo ditoy probinsiya ti La Union partikular ditoy syudad ti San Fernando ngem naulep ken nakuyem iti tangatang a mabuy-buyugan iti napigsa ken agsag-saga-wisiw nga angin.
