LA UNION – Nagballaag iti publiko ti Provincial Health Office (PHO) maipapan iti posible a panagraira iti sakit a leptospirosis iti panawen ti panagtutudo.
Ita pay laeng ket nagbalakaden ni Dr. Hector Beñas, a liklikan iti agluglog wenno agtukod iti danum ti tudo, a posible a nalaokan ti isbo ti utot, agsipudta ditoy iti pakaalaan ti bakterya a sumrek iti bagi nangruna nu adda ti open wound, a manggubway iti sakit a leptospirosis.
Iti sakit a leptospirosis ket makapatay nangruna nu saan a masigud wenno maipaayan a dagus ti pannakaagas iti maysa a pasyente.
Sumagmamano kadagiti simtomas ti sakit ket nangato a panaggurigor, panagsakit iti muscles, panagbakwar, jaundice wenno panagduyaw iti kudil ken mata, diarrhea, ken dadduma pay.
Naminsan pay nga impaganetget ni Dr. Beñas iti kinapateg ti nadalus nga aglawlaw tapno maliklikan dagiti naduma-duma a sakit wenno sagubanit.
