LA UNION – Kagiddan ti namaris a selebrasion ti Kaykay Festival 2026, maysa kadagiti napateg a program manipud ti lokal a gobierno ti Bagulin, iti salun-at dagiti taraken nga aso ken pusa, kasta met iti kinatalged ti komunidad babaen ti panangisayangkatda iti dakkel a kampania a mangipakaammo iti rabies awareness.
Kas paset ti pananglaglagip iti Rabies Awareness Month, nakikadua ti Provincial Veterinary Office (PVO) iti ili tapno mangipaay iti libre a serbisio.
Adu dagiti fur babies iti dimmupudop iti naituding a lugar, tapno makaala ti libre a bakuna kontra iti rabies ken ti libre a pakapon.
Daytoy a programa ket saan laeng a paset iti piesta, no di ket napateg nga addang tapno agtalinaed a natalged ti ili manipud iti pangta ti rabies.
Nagpalagip ni Doc. Calub, a saan baybay-an iti pangta ti rabies, dagus nga agpacheck up ken i-monitor iti taraken nu matay kalpasan ti 14 nga aldaw, dituy a maamuan nu addaan iti rabies dagiti taraken.
Para met iti first aid, kalpasan a nakagat wenno nakaramot ti aso wenno pusa, dagus nga ugasan ti running water ken agusar ti anti-bacterial soap.
Agtultuloy iti programa ti Provincial Veterinary Office a mangipaay ti libre a serbisyo. Sumaruno a turungenda iti ili ti Bacnotan inton Lunes para iti libre a serbisyo kas iti vaccination ken kapon para kadagiti aso ken pusa. (Report by Bombo Alphea)
