LA UNION – Imbutaktak ni La Union Provincial Board Member Kit Ortega nga agraraira iti panangiwaras ti kwarta wenno vote buying kangrunaan ita a panawen ti Paskua idiay ili ti Luna, La Union.
Iti pannakiuman ti Bombo Radyo kenni Ortega, kinunana a ti administrasyon iti ili a Luna ti adda iti likudan iti panangited ti kwarta kas regalo kadagiti barangay officials ken botante sadiay.
Sigun kenni Ortega, maipagarup a kwarta met laeng iti umili ti maiwarwaras idiay lugarda.
Umabot iti P20,000 ti maipagarup a regalo para ti kada kapitan; P5,000 para iti kagawad; kabayatan a sag-P3,000 met iti tanod ken barangay health worker; ken P2,000 iti botante.
No pagtitipunen iti amin sigun ti bokal, mabalin nga umabot iti P50 milyonti maiwaras a kwarta.
Agpanpanawagan ni Ortega iti pulisya ken kadagiti election officers a saan a palubusan iti nasao nga iligal nga aramid dagiti kalabanna iti politika.
Pinalagipanna met dagiti kakailyanna a saan nga agpaiduyos iti buteng ken agriingdan iti ikapudno maipapan iti kasasaad ti Luna nga ita ket ti kakaisuna nga ili iti umuna a distrito ti La Union nga adda iti sidong kas third class municipality ken nauidin iti panagdur-as.
Ni Ortega ket sumabak iti mayoralty race inton 2019 mid term election.
