LA UNION – Sinigurado ti Provincial Veterinary Office ditoy probinsiya ti La Union nga agtaltalinaed nga umdas iti supply ti baboy ditoy probinsiya,laksid ti timpuar nga African Swine Fever outbreak iti dua a probinsiya ditoy pagilian.
Idi kalman, Setyembre 18 2019, naminsan manen a naipaganetget ti pammilin iti Provincial Gov’t. of La Union (PGLU) maipapan iti temporary ban wenno a saan a panangipalubos a makastrek ditoy probinsiya dagiti produkto a karne ti baboy wenno sibibiag a baboy manipud idiay Rizal ken Bulacan, nga immunan a nakailistaan ti sumagmamano a baboy a natay gaputi ASF.
Iti pannakiuman ti Bombo Radyo La Union kenni Dr. Nida Gapuz, agdama a Provincial Veterinarian, kinuna na a natalged pay laenhg iti probinsiya manipud iti ASF, isutgapuna a nairut a maipatpatungpal ita dagiti preventive measures kas iti nairut nga animal checkpoint ken napinget a panangamiris dagiti maparti a baboy iti slaughter house ken uray dagiti mailaklakon a karne ti baboy iti merkado.
Kiniddaw ni Dr. Gapuz iti kooperasyon ken pannakintinnulong iti LGUs, municipaL agriculture officers, ken meat inspectors, tapno ipatungpal dagiti nasao nga addang kontra iti nasao a saki dagiti baboy.
Maiparit pay kunana iti agparti ti baboy iti bukod a lugar.
Ditoy probinsiya ti La Union, adda iti innem a nakamuntar a quarantine checkpoints a mangbantay kadagiti ayup a sumrek ken maidaldalan iti probinsiya.
Maipagarop a mangisay-sayangkat met ti information dessimination dagiti MAO iti masakopan da a lugar maipapan iti sakit nga ASF.
