LA UNION – Mangisaysayangkat iti Philippine Statistics Authority (PSA) – La Union Provincial Statistical Office ti 1st Quarter 2026 Commodity Flow Survey (CFS) a nangrugi idi Marso 18 agingga Abril 16, 2026, a mangsakup kadagiti 33 nga establisimiento iti intero a probinsia.
Iti nasao a survey ket ar-aramiden ti PSA tapno maala iti impormasion maipapan iti gatad ken kadakkel (volume) dagiti produkto wenno commodity a maiyakar manipud iti maysa a probinsia agingga iti sabali pay a probinsia iti pagilian babaen ti panagusar ti kalsada kas mode of transportation.
Segun ti PSA, iti Commodity Flow Survey ket naggapu iti panggep a mangala ti quarterly estimates iti amin a timbang ken gatad dagiti commodity iti regional level ken kasapulan dagiti grupo ti produkto.
Paset daytoy ti panangpalawa iti sakup ti Domestic Trade Statistics (DTS) nga idi ket nairaman laeng iti air ken water transport systems.
Gapu iti daytoy, kiddawen ti PSA iti suporta dagiti Local Government Units (LGUs) ken iti kooperasion dagiti napili nga establisimiento babaen ti panangited ti kompleto ken pudno nga impormasion kadagiti Statistical Researchers (SR) a mangisaysayangkat ti survey. (Report by Bombo Jordan)
Photo Courtesy: PSA – La Union Provincial Statistical Office
